№16 кесиптик лицейде киберкылмыштуулуктун жана дропперликтин алдын алуу боюнча түшүндүрүү иштери жүргүзүлдү.

admin /

​№16 кесиптик лицейде жаштар арасында киберкылмыштуулуктун алдын алуу, интернеттеги коопсуздукту камсыздоо жана «дропперлик» (мыйзамсыз акча каражаттарын айлантууга катышуу) сыяктуу укук бузууларга бөгөт коюу максатында атайын жолугушуу уюштурулду.
​Иш-чаранын алкагында «Жаштык» жатаканасында жашаган окуучулар үчүн укук коргоо органдарынын өкүлдөрүнүн катышуусунда маанилүү түшүндүрүү жана алдын алуу лекциясы өткөрүлдү.
​Жолугушууга чакырылган коноктор:
​Мирланбек уулу Азизбек — Ош ШИИБдин Кылмыш иликтөө бөлүмүнүн Киберкылмыштарга каршы күрөшүү бөлүмүнүн өзгөчө маанилүү иштер боюнча улук ыкчам өкүлү, милициянын капитаны;
​Аликулов Азамат Маматмусаевич — Ош ШИИБдин Кылмыш иликтөө бөлүмүнүн Киберкылмыштарга каршы күрөшүү бөлүмүнүн ыкчам өкүлү, милициянын капитаны;
​Досмотов Бакыт Болушбаевич — Ош ШИИБдин Ак-Буура милиция бөлүмүнүн ЖПКПнын улук лейтенанты.
​Иш-чарада каралган негизги маселелер:
​Жолугушуунун жүрүшүндө адистер окуучуларга азыркы санариптик доордо кеңири жайылып жаткан интернет-шылуундуктун түрлөрү, социалдык тармактардагы коопсуздук эрежелери жана банктык карталар аркылуу жасалган кылмыштар боюнча кеңири маалымат беришти.
​Өзгөчө көңүл «дропперликке» бөлүндү. Тагыраагы, жеңил акча табуу убадаларына азгырылып, өзүнүн банктык карталарын же электрондук капчыктарын чоочун адамдарга колдонууга берүү оор кылмыш болуп саналаары жана ал үчүн кылмыш жоопкерчилиги каралганы эскертилди.
​Окуучулар өздөрүн кызыктырган суроолорго жооп алып, интернеттеги шектүү сунуштардан кантип сактануу керектиги боюнча пайдалуу кеңештерди алышты.

«Русский дом» (Ош шаарындагы Россотрудничество) жетекчилиги менен жолугушуу.

admin /

Бүгүн Ош шаарындагы №16 кесиптик лицейде 2-курстун окуучуларынын Россиянын билим берүү жана маданият борбору — «Русский домдун» жетекчилиги менен жолугушуусу болуп өттү.
«Русский домдун» жетекчиси Дмитрий Николаевич Авраам лицейдин окуучуларын жана кызматкерлерин жылуу маанайда тосуп алып, куттуктады. Ошондой эле «Литературный диктант» сынагынын жеңүүчүлөрүнө дипломдорду тапшырды.

Борбордун жетектөөчү адиси Валентина Викторовна да окуучуларды куттуктап, мындай диктанттардын маанилүүлүгү тууралуу айтып берди. Ал орус тилинин Кыргызстанда өнүгүшүнө, жаш муундардын тилге болгон кызыгуусун арттырууга жана орус тилин жаштар арасында жайылтууга багытталган иш-чаралардын маанисин белгиледи.

Жолугушуунун жүрүшүндө окуучуларга Россияга иштөө же окуу максатында баруу үчүн зарыл болгон документтер, жолугушу мүмкүн болгон кыйынчылыктар жана Россия Федерациясынын мыйзамдарын билүүнүн маанилүүлүгү тууралуу кызыктуу видеоматериалдар көрсөтүлдү. Ошондой эле Россия менен Кыргызстандын ортосундагы өз ара кызматташтык, коомдук жайларда жана транспортто өзүн туура алып жүрүү, жүрүм-турум маданиятын сактоо эрежелери жөнүндө маалымат берилди.
Жолугушуунун алкагында «Русский домдун» жетекчиси лицейге окуу китептерин жана окуучулар менен окутуучулар үчүн көркөм адабияттарды белекке тапшырды.

Мындан тышкары, коноктор лицейдин китепкана фонду менен таанышып, китепкананын башчысы Хакимова Феруза Фанилевна менен маектешишти. Алар Россияда китепкана кызматкерлери үчүн өткөрүлүүчү семинарлар жана окуу курстары тууралуу маалымат берип, Феруза Фанильевнага алардын өткөрүлүү мөөнөттөрүнө байланыштуу жаңылыктарга көз салып турууну сунушташты.
Лицейдин тарбия иштери боюнча директордун орун басары Нурайым эжеке «Русский домдун» жетекчилигине лицей менен тыгыз кызматташып, орус тили жана адабияты мугалимдерин колдоп, билим берүү тармагына салым кошуп келе жаткандары үчүн чын жүрөктөн ыраазычылык билдирди.
Жолугушууда 2-курстун окуучулары Жаныл Мырза жана Абдулло да өз ойлорун бөлүшүп, «Русский домго» болгон ыраазычылыктарын билдиришти. Алар борбордун ишмердүүлүгү менен жакшы тааныш экендиктерин, анын иш-чараларына үзгүлтүксүз катышып келишерин белгилешти. Ошондой эле экинчи жылдан бери сынактардын катышуучулары жана жеңүүчүлөрү катары сертификаттарды жана дипломдорду алып жатышканына кубанычтарын билдиришти.

Лицейдин окуу методикалык иштери боюнча директордун орун басары Нишанова Кайыргүл эжеке лицейдин администрациясынын атынан конокторго жылуу сөздөрүн айтып, ыраазычылыгын билдирди.
Жолугушуу жылуу маанайдагы чай үстүндө уланды.
Бул жолугушуу билим берүү мекемелери ортосундагы достук мамилени бекемдеп, окуучулардын билимге, тил үйрөнүүгө жана маданияттар аралык байланыштарга болгон кызыгуусун арттырган маанилүү иш-чара болду.
№16 кесиптик лицейдин жамааты «Русский домдун» жетекчилигине мазмундуу жолугушуу, көрсөткөн колдоосу жана баалуу белектери үчүн терең ыраазычылык билдирет!
Баарыбызга тынчтык, ынтымак, достук жана жакшылык каалайбыз!

Келечекке кадам: Кесиптик лицейдин окуучулары Т.Сатылганов атындагы Ош облусттук китепканасында болушту.

admin /


​Бүгүн Токтогул Сатылганов атындагы Ош областтук китепканасы атайын келишимдин жана кызматташуунун алкагында №16 Кесиптик лицейдин жигердүү окуучуларын кучак жайып тосуп алды.
​ «Китепканада элдин үзгүлтүксүз билим алууга жана өнүгүүгө мүмкүнчүлүгүн кеңейтүү» долбоорунун алкагында саамалык жогорку деңгээлде уюштурулду.
​ Иш-чаранын негизги учурлары:
​Ысык салам жана ачылыш: Китепкананын директору Бапиева Динара Сапарбаевна катышуучуларды куттуктап, китепкананын заманбап мүмкүнчүлүктөрү тууралуу айтып берди.
​Даяр буюмдардын презентациясы: «Мурас» инновациялык колледжи, YOUTH OSH жана «Мүмкүнчүлүктөр дүйнөсү» борбору тарабынан даярдалган эмгектердин көрсөтүүсү өттү.
​Пайдалуу мастер-класстар:
​Улуттук кол өнөрчүлүк: сайма саюунун жаңы идеялары жана улуттук оймо-чиймелер;
​Бычуу жана тигүү: кездемелер менен иштөө, токуу ыкмалары;
​Санариптик сабаттуулук: Киберкоопсуздук эрежелери;
​Экологдук демилгелер: Климатты сактоо боюнча («Экоплаза») маалыматтар.

Мындай иш-чаралар жаштарга практикалык көндүмдөрдү калыптандырууга, өз ара тажрыйба алмашууга жана келечектеги кесибинде жаңы ийгиликтерге жетишүүгө чоң өбөлгө түзөт.

Жаштардын билимге, өнөр үйрөнүүгө болгон умтулуусу өлкөбүздүн өнүгүшүнө кошулган чоң үлүш! 

Таалим-тарбиянын булагы болгон ардактуу мугалимдер, майрамыңыздар куттуу болсун!

admin /

Кесиптик лицейбизде кесиптик майрам — Мугалимдер күнүнө карата окуучулар тарабынан даярдалган өзгөчө концерттик программа болуп өттү. Иш-чара абдан жогорку деңгээлде өтүп, жылуу маанайга жана кубанычка бөлөндү.
​Концерттин жүрүшүшүндө окуучулар мугалимдер жана устаттарына деген терең ыраазычылыгы чагылдырылды. Жаш өнөрпоздордун аткаруусундагы соонун ырлар, көркөм окуп берүүлөр жана улуттук каада-салтты чагылдырган бийлер көрүүчүлөрдүн маанайын көтөрүп , алкыштарга татыды. Жылмайган жүздөр, ыраазычылык сөздөр жана майрамдык маанай бүтүндөй окуу жайыбызды курчады.
​Лицейдин жамааты жана окуучулары бардык ардактуу мугалимдерди кесиптик майрамы менен чын жүрөктөн куттуктап, келечек муунду тарбиялоодогу түйшүктүү жана аруу эмгегине терең таазим этет. Сиздерге чың ден соолук, үй-бүлөлүк бакыт жана ишиңиздерге чоң ийгиликтерди каалайбыз!

№16 Кесиптик лицейдин окуучулары музейлерге экскурсияга барышты.

admin /


​Кыргыз Республикасынын Агартуу министрлигинин буйругунун негизинде, ошондой эле билим алуучулардын улуттук сыймык сезимин жана тарыхый-маданий баалуулуктарын чыңдоо максатында №16 Кесиптик лицейдин окуучулары үчүн таанышуу экскурсиясы уюштурулду.
​Экскурсиянын алкагында окуучулар:

 Ош шаарында жайгашкан «Сулайман-Тоо» улуттук тарыхый-археологиялык музей комплексине;
 Тургунбай Садыков  атындагы көркөм сүрөт музейге барышты.
​ Экскурсия учурунда окуучулар:
 Байыркы бабаларыбыздын тарыхы, музейдеги уникалдуу скульптуралар жана көркөм сүрөт эмгектери менен таанышышты;
 Улуттук искусствонун тарыхы жана өнүгүү жолу тууралуу кызыктуу маалыматтарды алышты;
 Кыргыз элинин түпкүлүгү, басып өткөн жолу жана бай маданий мурастары, баалуу экспонаттар менен жакындан таанышып, эстетикалык табити менен маданий көрөңгөсүн байытышты.
​Мындай тарыхый-маданий объекттерге баруу окуучулардын мекенчилдик сезимин чыңдап, дүйнө таанымын кеңейтүүгө чоң өбөлгө түзөт. Жаштарыбызды улуттук баалуулуктарга, искусствого жана Мекенди сүйүүгө тарбиялаган мындай иш-чаралар мындан ары да улантылмакчы! 

23-сентябрь Мамлекеттик тил күнү!

admin /

Бүгүн №16 Кесиптик лицейде Кыргыз тили күнүнө арналган салтанаттуу линейка болуп өттү. Таланттуу окуучуларыбыз бул күндү белгилөө үчүн атайын иш-чара даярдашты. Программада бийлер, ырлар, ыр саптарын көркөм окуу, ошондой эле «Манас» эпосунан үзүндү жана акындардын чыгармаларын аткаруу камтылды.

Линейканын максаты — эне тилдин маанилүүлүгүн эске салуу жана мекенге, улуттук маданиятка жана тарыхка болгон патриоттук сезимдерди ойготуу болду.

“Улуттук тазалык күнүнө карата ишембилик!”

admin /

2026-жылдын 19-сентябрында Кыргыз Республикасынын Президентинин Жарлыгына ылайык өткөрүлүп жаткан Жалпы республикалык Улуттук тазалык күнүнүн алкагында Ош шаарындагы №16 Кесиптик лицейде кеңири масштабдуу ишембилик өткөрүлдү.

Ишембиликтин алкагында лицейдин аймагы жана Касымбеков көчөсү тазаланып иретке келтирилди. Ошондой эле бак дарактардын бутактары кыркылып, актап-сырдоо иштери жүргүзүлүп, айлана-чөйрөнүн жалпы көркү жакшыртылды.

№16 Кесиптик лицейдин жамааты үчүн тазалык — бир күндүк иш-чара гана эмес, күнүмдүк жашоонун маанилүү бөлүгү. Таза жана көрктүү айлана-чөйрөнү түзүү — ар бирибиздин жалпы милдетибиз.

“Коррупцияга каршы бирге!”

admin /

№16 Кесиптик лицейде «Коррупцияга каршы бирге!» темасында түшүндүрүү иш-чарасы өткөрүлдү

Ош шаарындагы №16 Кесиптик лицейде Кыргыз Республикасынын Агартуу министрлигинин тапшырмасынын алкагында окуучулар арасында коррупциянын алдын алуу, анын терс кесепеттерин түшүндүрүү жана коррупцияга каршы маданиятты калыптандыруу максатында «Коррупцияга каршы бирге!» аттуу маалыматтык-түшүндүрүү иш-чарасы жогорку уюштуруучулук деңгээлде өткөрүлдү.

Иш-чаранын жүрүшүндө окуучуларга коррупция түшүнүгү, анын коомго жана мамлекеттин өнүгүшүнө тийгизген терс таасири, коррупциянын алдын алуунун мааниси тууралуу кеңири маалымат берилди.

Ошондой эле катышуучуларга эл аралык жаштар сынагынын максаттары, катышуу шарттары жана сынактын негизги номинациялары боюнча маалыматтар айтылды.

Сынактын негизги номинациялары:

  • «Мыкты сүрөт»
  • «Мыкты плакат»
  • «Мыкты видеоролик»

Иш-чарада лицейдин окуучулары активдүү катышып, өз ойлорун жана чыгармачылык идеяларын ортого салышты. Окуучулар коррупцияга каршы күрөшүүдө жаштардын жоопкерчилиги, адилеттүүлүк, чынчылдык жана мыйзамдуулукту сактоонун маанилүүлүгү боюнча өз ара пикир алышышты.

Иш-чаранын соңунда чыгармачылыкка кызыккан окуучулар сынакка катышуу үчүн өз эмгектерин даярдоо жана аларды www.anticorruption.life расмий сайты аркылуу жайгаштыруу боюнча тиешелүү багыт-кеңештерди алышты.

Коррупциясыз коомду куруу — ар бирибиздин жалпы милдетибиз!

№16 Кесиптик лицейдин чыгармачыл жана активдүү жаштарына эл аралык сынакка катышууда ийгиликтерди, жаңы идеяларды жана чыгармачылык жетишкендиктерди каалайбыз!

Билим күнү

admin /

2026-жылдын 15-сентябрында Ош шаарындагы №16 Кесиптик лицейде жаңы окуу жылынын башталышына жана Билим күнүнө карата салтанаттуу линейка өткөрүлдү.

Салтанаттуу иш-чарага лицейдин жетекчилиги, окутуучулар, өндүрүштүк окутуунун устаттары, окуучулар жана ата-энелер катышты.

Линейканы №16 Кесиптик лицейдин директору Абжалиева Нематхон Токобековна ачып, окуучуларды жана мугалимдер жамаатын жаңы окуу жылынын башталышы менен куттуктады. Өз сөзүндө ал билим алуунун, кесиптик билимге ээ болуунун жана келечекке ишенимдүү кадам таштоонун маанилүүлүгүн белгилеп, окуучуларга окууда ийгиликтерди, бекем ден соолук жана алдыга койгон максаттарына жетишин каалады.

Иш-чаранын жүрүшүндө окуучуларга жаңы окуу жылында ийгиликтүү билим алып, тандаган кесибин мыкты өздөштүрүп, коомго пайдалуу кесипкөй адис болууга чакырыктар айтылды.

Салтанаттуу линейка концерттик программа менен коштолду. Лицейдин окуучулары тарабынан ыр-бийлер, музыкалык чыгармалар жана көркөм номерлер тартууланып, майрамдык маанай тартуулашты.

Ошондой эле иш-чарага келген ата-энелер да өздөрүнүн жылуу каалоо-тилектерин билдирип, окуучуларды жаңы окуу жылынын башталышы менен куттукташты. Алар жаштардын сапаттуу билим алып, кесип үйрөнүп, келечекте өз ордун табышына тилектештигин билдиришти.

Билим күнү — бул жаңы максаттардын, жаңы мүмкүнчүлүктөрдүн жана жаңы жетишкендиктердин башаты. №16 Кесиптик лицейдин жалпы жамааты бардык окуучуларга жаңы окуу жылында ийгилик, изденүү жана бийик жетишкендиктерди каалайт!

Жаңы окуу жылыңыздар ийгиликтүү болсун! Билимге умтулууңуздар артып, келечекке жасаган кадамдарыңыздар кең болсун.

«БИРГЕЛЕШКЕН ИЙГИЛИККЕ 10 КАДАМ»

admin /

2026-жылдын жаңы окуу жылына карата Кыргыз Республикасынын билим берүү уюмдарында «Биргелешкен ийгиликке 10 кадам» аталышындагы ата-энелер декадасы 2-сентябрдан 14-сентябрга чейин уюштурулууда.

​№16 Кесиптик лицейде да «Биргелешкен ийгиликке 10 кадам» ата-энелер декадасы жигердүү өтүүдө.

​Иш-чаранын негизги максаты: ата-эне, окуучу, мугалим жана өндүрүштүк окутуу  устаттарынын ортосундагы кызматташтыкты бекемдөө, жаштарды тарбиялоодо, билим берүүдө, кесип тандоодо жана коопсуз келечегин камсыз кылууда биргелешкен аракетти күчөтүү. Анткени баланын ийгилиги — лицей менен ата-эненин биргелешкен аракетинен башталат.

​Бул маанилүү демилгенин алкагында №16 кесиптик лицейинде лицей жетекчилигинин, мугалимдердин жана өндүрүштүк устаттардын ата-энелер менен биргеликте ар түрдүү иш-чаралары уюштурулуп, жаңы окуу жылын ийгиликтүү баштоого багытталган иштер жүргүзүлүүдө. Декаданын жүрүшүндө ата-энелер жана окуучулар үчүн актуалдуу маселелер камтылып, жолугушуулар, түшүндүрүп-маалымдоо иштери, ачык баарлашуулар жана тарбиялык иш-чаралар өткөрүлүп, ар бир күн өзүнчө мазмунга ээ болууда.

​Өзгөчө көңүл жаштардын төмөнкү багыттарына бурулууда:

  • ​Сапаттуу билим алуусуна;
  • ​Кесипти туура тандоосуна;
  • ​Ата-эне менен баланын өз ара түшүнүшүүсүнө;
  • ​Сергек жашоо образын калыптандырууга;
  • ​Коопсуз чөйрөдө билим алуусуна;
  • ​Буллинг жана кибербуллингдин алдын алууга;
  • ​Эрте никенин жана башка терс көрүнүштөрдүн алдын алууга.

​«Биргелешкен ийгиликке 10 кадам» — бул ата-эне, мугалим жана окуучунун бир максатта биригип, жаштардын жаркын келечегине карай жасаган биргелешкен кадамдары. №16 Кесиптик лицейи ата-энелерди билим берүү жана тарбиялоо процессине активдүү өнөктөш болууга чакырат.

​БИЗДИН МАКСАТ:

Биргеликте аракет кылсак — ийгиликке сөзсүз жетебиз!

Декаданын күндөлүк иш чаралары:

02.09.2026 Жаңы окуу жылына бирге даярданабыз: 12 жылдык билим берүүгө өтүү баскычы, окуу китептери жана адистик тандоо.

03.09.2026 “Балдардын келечеги- “Эрте нике жана кыз адеби”

04.09.2026 “Баңгизат жана радикализмге каршыбыз”

05.09.2026 “Зомбулуксуз лицей: угуу жана түшүнүү”

07.09.2026 “Үй-бүлө улуттук баалуулуктардын жана тарбиянын негизи”

08.09.2026  Санариптик “Электрондук күндөлүк”. Санариптик дүйнөдө баланы коргоо: ата-эне, лицей жана бала.

09.09.2026 “Дени сак бала- дени сак келечек”. “Сергек жашоо– жаркын келечек”

10.09.2026 Чынчылдык үй-бүлөдөн башталат.

Баланын коопсуздугу үй-бүлөдөн башталат.

Бул күндөгү жолугушуу ата-эне менен лицейдин ортосундагы кызматташтыктын маанилүүлүгүн дагы бир ирет көрсөттү. Ата-энелер өздөрүн кызыктырган суроолор боюнча пикир алышып, окуучунун ийгилиги үчүн үй-бүлө менен лицейдин бир багытта аракеттенүүсү зарыл экендигин белгилешти.
Биздин иш-чаранын негизги жыйынтыгы — бала үчүн жоопкерчиликти бири-бирибизге өткөрүп койбостон, анын келечегин биргеликте куруу.
«Ар бир жакшы кадам — баланын жаркын келечегине жасалган кадам!»