​№16 КЕСИПТИК ЛИЦЕЙДЕ РЕСПУБЛИКАЛЫК СЕМИНАРДЫН АЛКАГЫНДА ТАЖРЫЙБА АЛМАШУУ ЖОЛУГУШУУСУ ӨТТҮ.

admin /

​Кыргыз Республикасынын Агартуу министрлигинин 2026-жылдын 30-октябрындагы №1460/1 буйругуна ылайык, 2026-жылдын 5–6-ноябрь күндөрү Ош шаарында “12 жылдык билим берүү системасында кесиптик башталгыч билим берүүнүн ролу” деген темада республикалык семинар болуп өттү. Бул маанилүү иш-чаранын алкагында республикабыздын кесиптик лицейлеринин директорлорунун №16 кесиптик лицейге тажрыйба алмашуу максатындагы иш сапары уюштурулду.
​Кадырлуу конокторду лицейдин директору Нематхон Токобековна Абжалиева баштаган эмгек жамааты өзгөчө жылуу маанайда, кыргыз элинин меймандостук салтын даңазалаган терең урмат-сый менен тосуп алышты.
​Жолугушуунун жүрүшүндө коноктор лицейдин материалдык-техникалык базасы, билим берүү шарттары жана окуу-өндүрүштүк ишмердүүлүгү менен жакындан таанышышты. Алар окуу корпусун, заманбап жабдуулар менен камсыздалган өндүрүштүк устаканаларды, студенттердин жатаканасын жана ашкананы кыдырып көрүштү.
​Экскурсия учурунда окуу жайдагы тазалыкка, тартипке, бөлмөлөрдүн иреттүүлүгүнө, окуучулар үчүн түзүлгөн шарттарга жана материалдык-техникалык базанын абалына өзгөчө көңүл бурулду. Лицейдин ар бир бурчунан байкалган тыкандык, уюшкандык жана жамааттын жоопкерчиликтүү мамилеси коноктордун жогорку баасына татыды.
​Таанышуу экскурсиясынан соң меймандар лицейдин окуу залына чакырылып, жылуу маанайдагы баарлашуу уюштурулду. Меймандарга чай дасторкону жайылып, андан соң лицейдин директору Нематхон Токобековна Абжалиева сөз сүйлөп, окуу жайдын жетишкендиктери, билим берүүнүн сапатын жогорулатуу багытында жүргүзүлүп жаткан иштер, окуу-өндүрүштүк ишмердүүлүк жана эмгек жамаатынын биргелешкен аракеттери тууралуу кеңири маалымат берди. Ошондой эле алдыдагы максаттарга жана өнүгүү пландарына токтолуп, кесиптик билим берүүнүн сапатын арттыруу, заманбап талаптарга жооп берген адистерди даярдоо багытындагы иштер мындан ары да улантыларын белгиледи.
​Иш-чаранын жүрүшүндө Кыргыз Республикасынын Агартуу министрлигинин Башталгыч кесиптик билим берүү башкармалыгынын жетектөөчү адиси Бакытбек Кенжебекович Алымбеков сөз сүйлөп, лицейдин ишмердүүлүгүнө жогору баа берди. Ал өз сөзүндө окуу жайдагы тартипти, тазалыкты, уюшкандыкты жана жамааттын эмгегин өзгөчө белгилеп, бул жерден байкалган жоопкерчилик менен жасалган иштер башка кесиптик билим берүү уюмдары үчүн да үлгү болорун баса белгиледи.
​Жолугушуунун соңунда башка кесиптик лицейлердин директорлору жана министрликтин өкүлдөрү көрсөтүлгөн меймандостук, иш-чаранын жогорку деңгээлде уюштурулушу жана тажрыйба алмашууга түзүлгөн жагымдуу шарттар үчүн лицей жетекчилигине жана жалпы эмгек жамаатына ыраазычылык билдиришти.
​Бул жолугушуу — №16 кесиптик лицейдин ишмердүүлүгүн таанытуу менен гана чектелбестен, кесиптик билим берүү тармагындагы кызматташтыкты чыңдоого, алдыңкы тажрыйбаларды бөлүшүүгө жана өз ара өнүгүүгө багытталган маанилүү иш-чара болду.
​№16 кесиптик лицей — сапаттуу билимге, татыктуу кесипке жана келечекке ишенимдүү кадам таштаган жаштардын ордосу!

№16 КЕСИПТИК ЛИЦЕЙДЕ ВОЛЕЙБОЛ БОЮНЧА СПОРТТУК МЕЛДЕШ ӨТКӨРҮЛДҮ.

admin /

Кыргыз Республикасынын Министрлер Кабинетинин №618 токтомун жана Ош шаарынын мэриясынын тиешелүү чечимдерин ишке ашыруу, ошондой эле жаштар арасында сергек жашоо образын жайылтуу, ден соолукту чыңдоо жана спортко болгон кызыгууну арттыруу максатында №16 кесиптик лицейинде окуучулар арасында волейбол боюнча мелдеш уюштурулду.

Спорттук мелдешке лицейдин окуучу кыздары жана балдары активдүү катышып, өздөрүнүн спорттук даярдыгын, шамдагайлыгын, командалык биримдигин жана жеңишке болгон умтулуусун көрсөтүштү.

Мелдеш кызыктуу жана атаандаштык маанайда өтүп, катышуучулар арасында достук, ынтымак жана өз ара колдоо атмосферасы түзүлдү.

Жыйынтыгында мыкты оюн көрсөткөн командалар аныкталып, жеңүүчүлөр жана байгелүү орундардын ээлери Ардак грамоталар жана медалдар менен сыйланышты.

Мындай спорттук иш-чаралар жаштардын ден соолугун чыңдоого, сергек жашоо маданиятын калыптандырууга, бош убактысын пайдалуу уюштурууга жана командалык ынтымакты бекемдөөгө өбөлгө түзөт.

Дени сак муун — өлкөнүн жаркын келечеги!
Спорт — ден соолуктун булагы, биримдиктин жана жеңиштин символу!

№16 кесиптик лицейде КМШнын 35 жылдыгына арналган илимий-таанып билүү конференциясы өттү.

admin /

Кыргыз Республикасынын Агартуу министрлигинин 2026-жылдын 19-октябрындагы № 05-3/4883 сандуу катынын негизинде жана КМШнын түзүлгөндүгүнүн 35 жылдыгына арналган иш-чараларды уюштуруу максатында №16 кесиптик лицейде атайын буйрук чыгарылып, иш-чаралар планы бекитилген.

Бекитилген планга ылайык, лицейде «КМШнын түзүлүшү, тарыхы жана бүгүнкү күндөгү ролу» аттуу илимий-таанып билүү конференциясы өткөрүлдү.

Иш-чарага лицейдин жетекчилиги, тарых мугалимдери, мугалим-устаттар жана окуучулар катышты.

Конференциянын жүрүшүндө КМШнын түзүлүү тарыхы, максаттары, эл аралык мамилелердеги орду жана мүчө мамлекеттердин ортосундагы кызматташтык байланыштары тууралуу баяндамалар жасалды. Окуучулар алдын ала даярдаган рефераттарын жана докладдарын сунуштап, темалар боюнча өз ойлорун билдиришти. Баяндамалардан кийин суроо-жооптор уюштурулуп, пикир алмашуулар болду. Иш-чара музыкалык номерлер менен коштолду.

Мындан тышкары, конференциянын мазмунун толуктоо жана юбилейлик датанын маанисин чагылдыруу максатында тематикалык стенддер даярдалды. Бул иштерди уюштурууга тарых мугалимдери жана китепканачы да өз салымдарын кошушту.

Иш-чара окуучулардын тарыхый билимин кеңейтүүгө, изилдөөчүлүк жөндөмдөрүн өнүктүрүүгө жана эл аралык кызматташтыктын маанисин түшүнүүгө багытталды.

№16 кесиптик лицейде мындай иш-чараларды өткөрүү жаш муундардын тарыхый аң-сезимин калыптандырууга, жарандык жоопкерчилигин арттырууга жана элдер ортосундагы достук мамилелерди бекемдөөгө өбөлгө түзөт.

№16 кесиптик лицейде Камбаралы Бобуловдун 90 жылдыгына арналган эскерүү кечеси өттү.

admin /

2026-жылдын 21-октябрында №16 кесиптик лицейдин жыйындар  окуу залында кыргыз адабиятынын көрүнүктүү өкүлү, Кыргыз Эл жазуучусу, окумуштуу Камбаралы Бобуловдун 90 жылдыгына арналган «Камбаралы Бобуловдун чыгармачылык мурасы» аттуу илимий-адабий конференция жана эскерүү кечеси жогорку деңгээлде өттү.
Иш-чара эки бөлүктөн туруп, залкар калемгердин өмүр жолун жана бай чыгармачылык мурасын кеңири чагылдырды.
Иш-чаранын 1-бөлүгүндө окуучулардын жана чакырылган меймандардын катышуусундагы салтанат
Иш-чара катышуучуларды каттоо, меймандарды тосуп алуу жана К. Бобуловдун өмүрү менен чыгармачылыгына арналган атайын слайд-презентацияны көрсөтүү менен башталды.
Салтанатты №16 кесиптик лицейдин директордун окуу-тарбия иштери боюнча орун басары Н. Байтикова алып барды. Лицей жетекчилиги, атайын чакырылган кадырлуу коноктор жана окумуштуулар куттуктоо сөздөрүн сүйлөштү.
Пленардык жыйында төмөнкү мазмундуу баяндамалар жасалды:
«Камбаралы Бобуловдун кыргыз адабиятындагы орду жана чыгармачылык мурасы» — Туратова М.
«Камбаралы Бобуловдун поэзиясындагы көркөм дүйнө жана эстетикалык изденүүлөр» — Сатимбаева А.
«Камбаралы Бобуловдун адабий сыны жана адабий процесстеги орду» — педагогика илимдеринин кандидаты, доцент Байтикова Б.
«Эне тил барда мен бармын, Эне тил менен Камбармын» — филология илимдеринин кандидаты Махабат Мамырова.
«Камбаралы Бобуловдун көркөм жана педагогикалык мурасы» — Тагайбек кызы Айтурган
«Залкар калемгердин өмүр жолу жана агартуучулук ишмердүүлүгү» — Жолдошбай кызы Ынтызаар
Конференцияга лицейдин кыргыз тили жана адабияты мугалимдери жигердүү катышып, өз ой-толгондору менен бөлүшүштү. Ошондой эле окуучулар калемгердин ырларын көркөм окушуп, жыйынга өзгөчө маанай тартуулашты.

Иш-чаранын экинчи бөлүгү өндүрүштүк окутуу устаттарынын жана тарбиячылардын катышуусундагы эскерүү кечеси менен уланды.
Программада:
Залкар жазуучунун өмүрү жана чыгармачылыгы боюнча кызыктуу суроо-жооп викторинасы уюштурулду.
Музыкалык тыныгуу орун алып, калемгердин сөзүнө жазылган обондуу ырлар аткарылды.
Устаттар менен тарбиячылар жазуучунун адабий мурасы боюнча пикир алышып, кече абдан шаңдуу жана эсте каларлык маанайда өттү.

Иш-чаранын соңунда залкар инсандын мурасын жаш муундарга жеткирүү жана кесиптик билим берүү тармагында кеңири жайылтуу боюнча атайын резолюция кабыл алынды.

«Алтын күздүн адабий обону»: №16 Ош кесиптик лицейинде чыгармачылык кече өттү.

admin /

Поэзия, музыка, бий жана сахналык өнөр айкалышкан «Адабий күз» кечеси окуучулардын чыгармачылык жөндөмүн ачып, көрүүчүлөргө өзгөчө маанай тартуулады.
Күз — табияттын алтын түскө боёлуп, адамдын жан дүйнөсүнө өзгөчө көрк жана поэтикалык маанай тартуулаган мезгили. Ушундай керемет мезгилде №16 Ош кесиптик лицейинде орус тили жана адабиятынын айлыгына арналган «Адабий күз» аттуу адабий-музыкалык кече өткөрүлдү.
Иш-чара окуучулардын орус тилине жана адабиятына болгон кызыгуусун арттыруу, көркөм окуу жөндөмүн өнүктүрүү, чыгармачылык шыгын колдоо жана адабият аркылуу руханий дүйнөсүн байытуу максатын көздөдү.
Кече учурунда окуучулар орус адабиятынын көрүнүктүү өкүлдөрүнүн күз мезгилин даңазалаган ырларын көркөм окуп, өздөрүнүн тил билүү деңгээлин, сахна маданиятын жана чыгармачылык жөндөмдөрүн көрсөтүштү. Ар бир чыгарманы аткарууда көркөм сөзгө болгон сүйүү, даярдыктын жогорку деңгээли жана адабий мураска болгон урмат-сый байкалды.
Поэзия, музыка жана бий — бир сахнада
Кеченин көркүн поэзия менен катар музыка жана бий толуктады. «Осенний сон» күүсүнүн коштоосунда 1- жана 2-курстун студенттери назик вальс бийин аткарып, көрүүчүлөргө эстетикалык ырахат тартуулашты.
Ал эми 1-курстун студенти Фатима өз калемине таандык ырларын көркөм окуп берип, көрүүчүлөрдүн көңүлүн өзгөчө бурду. Анын чыгармачылык аракети жаштардын арасында адабиятка, поэзияга жана өз оюн көркөм сөз аркылуу жеткирүүгө болгон кызыгуу бар экенин дагы бир жолу далилдеди.
«Репка» жомогу — жаңыча чечмелөөдө
Иш-чаранын кызыктуу учурларынын бири — орус элинин белгилүү «Репка» («Шалгам») жомогунун заманбап үлгүдө сахналаштырылышы болду. Катышуучулар жомоктун мазмунун бүгүнкү күндүн жаштарына жакын тамашалар, заманбап сөз айкаштары жана шаңдуу кыймылдар менен айкалыштырып, көрүүчүлөргө жагымдуу маанай тартуулашты.
Бул көрүнүш окуучулардын сахнада эркин иштөө, образ жаратуу, өз ара кызматташуу жана чыгармачылык менен ой жүгүртүү жөндөмдөрүн көрсөттү.
Иван Буниндин чыгармасы аркылуу адам тагдырына саресеп
Орус адабиятынын көрүнүктүү өкүлү Иван Буниндин «Тёмные аллеи» чыгармасынын негизинде даярдалган сахналык көрүнүш кеченин мазмунун тереңдетти. Студенттер Николай Алексеевич менен Надежданын көп жылдардан кийинки жолугушуусун сахналаштырып, адам тагдыры, өткөн өмүр, сүйүү жана өкүнүч темаларын көркөм чагылдырышты.
Каармандардын ички сезимдерин сахна аркылуу жеткирүүгө жасалган аракет көрүүчүлөрдү ойго салып, адабий чыгармалардын адамдын жан дүйнөсүн таанып-билүүдөгү маанисин ачып берди.
Улуттардын маданиятын даңазалаган бийлер
Кеченин шаңын  66-67  тайпаларынын кыздары бийлеген, орус элинин бийлери дагы өзгөчө болду.  Ар бир бий өзүнө мүнөздүү ыргак, кыймыл жана улуттук өзгөчөлүктөрү менен айырмаланып, көрүүчүлөрдүн жылуу кабыл алуусуна ээ болду.

Мындан тышкары, мугалимдер менен студенттердин биргелешип катышуусунда кызыктуу конкурстар уюштурулуп, залда күлкү, кубаныч жана жагымдуу маанай өкүм сүрдү. Мындай иш-чаралар окутуучулар менен студенттердин ортосундагы өз ара түшүнүшүүнү бекемдеп, жамааттык ынтымакты чыңдоого өбөлгө түзөт.
«Мыкты» деген наамдан да жогору — чыгармачылык жана биримдик
Кечеде өзүнчө «мыкты катышуучу» наамын аныктоочу сынак өткөрүлгөн жок. Анткени бул иш-чаранын башкы максаты жеңүүчүнү тандоо эмес, ар бир катышуучуга өзүнүн жөндөмүн көрсөтүүгө мүмкүнчүлүк берүү, чыгармачылыкты колдоо жана биргелешкен эмгектин баалуулугун даңазалоо болду.
Иш-чаранын ар бир катышуучусу өзүнүн аракети, таланты жана даярдыгы менен кеченин ийгилигине салым кошту.
«Орус үйүнүн» өкүлүнөн жылуу пикир.
Кечеге ардактуу конок катары «Орус үйү» — билим берүү жана маданият борборунун башкы адиси Валентина Викторовна катышты. Ал лицейдин жамаатына ыраазычылык билдирип, орус тилин үйрөнүүгө жана жайылтууга багытталган иштердин маанилүүлүгүн белгиледи.
Өз сөзүндө ал:
«Эмне демекчимин, азаматсыздар! Абдан сонун! Лицейде орус тилин өнүктүрүп, жайылтып жатканыңыздар үчүн чоң рахмат!» — деп, иш-чаранын уюштуруучуларына жана катышуучуларына жылуу пикирин билдирди.
Анын бул сөздөрү лицейдин педагогикалык жамаатынын эмгегине берилген жакшы баа болуп, мындан аркы чыгармачылык иштерге дем-күч берди.
Жыйынтык
«Адабий күз» кечеси — тилди үйрөнүү, адабиятты таануу, чыгармачылыкты өнүктүрүү жана маданий баалуулуктарды урматтоо бир максатка бириккен мазмундуу иш-чара болду.
Бул кеченин ийгилигине салым кошкон орус тили жана адабияты мугалимдерине, даярдык көргөн студенттерге, чыгармачылык өнөрүн тартуулаган катышуучуларга жана ардактуу конокторго терең ыраазычылык билдиребиз.
Өнөрлүү жаштарыбыздын шыгы өркүндөп, билимге болгон кызыгуусу артып, чыгармачылык жолдору ийгиликтерге бай болсун!
№16 Ош кесиптик лицейи — билимге, өнөргө жана келечекке умтулган жаштардын ордосу!

№16 кесиптик лицейинде «Ата-эне — лицей — окуучу: биргелешкен жоопкерчилик жана ийгилик» аттуу жалпы ата-энелер чогулушу болуп өттү.

admin /

Быйылкы окуу жылында №16 кесиптик лицейинде 1 жана 2-курстун студенттеринин ата-энелери үчүн эки күнгө созулган масштабдуу жалпы ата-энелер чогулушу жогорку деңгээлде өткөрүлдү. Иш-чаранын башкы максаты – ата-энелер менен лицейдин кызматташтыгын бекемдөө, студенттердин билим алуусу, тартиби, кесиптик даярдыгы жана коопсуздугу боюнча биргелешкен жоопкерчиликти күчөтүү.
Ата-энелерди лицейдин кире беришинен эле мугалим-устаттар жылуу тосуп алып, каттоодон өткөрүп, жагымдуу маанай тартуулашты. Айрыкча 2-курстун сулуу кыздары улуттук меймандостукту көрсөтүп, ысык чай, кофе жана даамдуу таттуулар менен тосуп алганы келген конокторго өзгөчө жагымдуу сезим тартуулады.
Чогулуштун расмий бөлүгү Кыргыз Республикасынын Мамлекеттик гимни менен башталды. Андан соң лицей жөнүндө видеоролик көрсөтүлүп, лицейдин таланттуу жаш агай-эжекелер, окуучу кыздары тарабынан даярдалган сонун концерттик программа тартууланып, келген коноктордун маанайын көтөрдү.
Иш-чараны лицейдин директору Абжалиева Нематхон Токобековна куттуктоо сөзү менен ачып, катышкан ата-энелерге терең ыраазычылык билдирди.
Чакырылган кадырлуу коноктор жана маанилүү маселелер
Бул жолугушуу өзгөчө мааниге ээ болуп, окуучулардын коопсуздугун жана социалдык абалын көзөмөлдөө максатында шаардык мекемелердин атайын өкүлдөрү чакырылды:
Кулуева Гүлбара Сабиралиевна – Ош шаарынын мэриясынын алдындагы тармактык «Үй-бүлөгө жана балдарга жардам берүү борборунун» директору;
Абсадыкова Элиза Абдыкасымовна –  Ош шаардык Эмгек, социалдык камсыздоо жана миграция башкармалыгынын «Үй-бүлө жана балдарды коргоо бөлүмүнүн» башкы адиси;
Орозбеков Бехзат Орозбекович – Ак-Буура милиция бөлүмүнүн Тергөө кызматынын башчысы;
Капарова Алтынай Абдыкадыровна – Ак-Буура милициясынын Жашы жете электердин иштери боюнча инспекциясынын улук тескөөчүсү, милициянын майору;
Досматов Бактыбек Болушбаевич – Ош шаардык ички иштер башкармалыгынын Ак-Буура милиция бөлүмүнүн жашы жете электер боюнча инспектору, милициянын улук лейтенанты.
Күн тартибиндеги негизги багыттар:
Үй-бүлөдө ата-эненин орду жана балага болгон мамиле – Кулуева Г. С.
Укук бузуулардын алдын алуу жана укуктук жоопкерчилик – ЖЖИ( ИДН) кызматкерлери.
Балдардын билим алуусу, тарбиясы, кесиптик даярдыгы жана келечеги үчүн лицей менен кызматташууну бекемдөө, туура багыт көрсөтүү – лицейдин директору Абжалиева Н. Т.
Окуу-методикалык иштер, сабакка катышуу жана өздөштүрүү көрсөткүчтөрү — окуу-методикалык иштер боюнча директордун орун басары Нышанова К.
Билим сапаты, ЖРТ жана «Электрондук күндөлүк» – окуу бөлүмүнүн башчысы Жылчыева Г.
Лицейдин ички тартиби, коопсуздук эрежелерин сактоо, адептүүлүк жана ата-энелер менен тыгыз кызматташуу –  тарбия иштери боюнча директордун орун басары Байтикова Н.
Окуудагы жетишкендиктер жана стипендия төлөө тартиби –  усулчу Каримова А.
Өндүрүштүк окутуу жана өндүрүштүк практикага жайгаштыруу –  улук устат Шааболотов А.
Жатаканадагы тартип жана жашоо шарттары — жатакана жетекчиси Жалалова М.
Чогулуштун соңунда ата-энелер уюштуруучуларга ыраазычылык билдирип, өздөрүн кызыктырган суроолорду узатып, тиешелүү жоопторду алышты. Мындай жолугушуулар мугалим, окуучу жана ата-эне ортосундагы байланышты бекемдеп, балдардын жаркын келечеги үчүн чоң кадам болоруна ишенебиз.

ОКУУЧУЛУК ДООРДУН ЭҢ ТАТТУУ КҮНДӨРҮ — №16 КЕСИПТИК ЛИЦЕЙДИН «ЖАШТЫК» ЖАТАКАНАСЫНДА!

admin /

 
Окуучулук жылдар — адам өмүрүнүн эң унутулгус, кайталангыс жана кубанычка толгон баракчасы. Ал эми бул таттуу көз ирмемдердин борбору — №16 кесиптик лицейдин «Жаштык» студенттик жатаканасы! 
Бул жер жөн гана баш калкалоочу жай эмес, бул — жаштарыбыздын достугу бекемделген, кесиптик чеберчиликке үйрөнүп, келечекке ишенимдүү кадам таштаган куттуу очогу.
«Жаштык» жатаканасынан орун алган заманбап шарттар жана мүмкүнчүлүктөр:
Жатакана атайын секцияларга бөлүнүп, кыздарга жана балдарга өзүнчө ыңгайлаштырылган. Бөлмөлөрдө жумшак керебет (диван), заманбап эмеректер бар жана кышкысын абдан жылуу, таза.
Атайын тамак даярдоочу жай: Муздаткычтар (холодильник), плиталар жана керектүү тиричилик шаймандары менен камсыздалып, окуучулар каалаган тамактарын даярдап жешет.
Жыйын залы: Ар кандай тарбиялык иш-чараларды, уюштуруу чогулуштарын өткөрүүгө ылайыкталган кенен зал.
Кол өнөрчүлүк канасы: Окуучулардын чыгармачылыгын өстүрүүгө, чеберчиликке үйрөнүүгө жана бош убактысын пайдалуу өткөрүүгө арналган атайын бөлмө.
Эс алуу бөлмөсү: Сабактан кийин окуучулардын эркин эс алуусу жана жаңылыктарды, берүүлөрдү көрүүсү үчүн телевизор орнотулган жайлуу зона.
Тазалык жана гигиена шарттары: Ар дайым ысык-муздак суусу бар заманбап душ бөлмөлөрү жана кир жуучу машиналар менен толук камсыздалган.

Жатаканада ар бир окуучу өзүн коопсуз жана үйдөгүдөй сезүүсү үчүн тажрыйбалуу жатакана башчысы Жалалова Махабат эжеке жана тарбиячылар күн сайын камкордук менен иш алып барышат.
Окуучулардын тарбиясына, жашоо шартына жана коопсуздугуна лицейдин директору Нематхон Токобековна Абжалиева өзгөчө көңүл буруп, жатакананын абалын дайыма колдоосунда жана жеке көзөмөлүндө кармайт.
Окуучулук доордун эң таттуу күндөрү — №16 кесиптик лицейде!

Ош шаарында «2026–2030-жылдарга өнөкөт бөйрөк оорусун профилактикалоо, диагностикалоо жана дарылоо системасын өркүндөтүү» мамлекеттик программасын ишке ашыруу алкагында №16 кесиптик лицейде атайын иш-чара өткөрүлдү.

admin /

Кыргыз Республикасынын Министрлер Кабинетинин №618 токтомун жана Ош шаарынын мэриясынын тиешелүү чечимдерин ишке ашыруу алкагында, №16 кесиптик лицейинде жаштардын жана эмгек жамаатынын саламаттыгын чыңдоого багытталган өзгөчө жана абдан пайдалуу кездешүү болуп өттү.

Иш-чарага атайын чакыруу менен медицина тармагынын тажрыйбалуу адистери — Мирсаитов Чингиз Булатович (уролог, бөйрөк оорулары боюнча мыкты адис) жана Турдубай кызы Нуржамал (ден-соолукту чыңдоо боюнча атайын адис) келип катышты.
​Кездешүүдө эмнелер айтылды?
Дарыгерлер өнөкөт бөйрөк ооруларынын алдын алуу, организмди ашыкча туз, шекер жана зыяндуу адаттардан коргоо, ошондой эле күнүмдүк турмушта туура тамактануу менен суу балансын сактоонун маанилүүлүгүн интерактивдүү форматта түшүндүрүп беришти.
​«Өз убагында жасалган профилактика — келечектеги чың ден-соолуктун кепилдиги!» — деген башкы кайрылуу менен адистер катышуучуларды өз ден-соолугуна кайдыгер карабоого жана үзгүлтүксүз текшерилип турууга чакырышты.
​Катышуучулар өздөрүн кызыктырган көптөгөн суроолорго дарыгерлерден түз жана профессионалдуу жоопторду алышты. Андан сырткары, лицейдин медайымы, «Коопсуз сергек жашоо мүнөзү» сабагы боюнча мугалими Топчубаева Майрамкан эже аягында жыйынтыктап, оорунун алдын алуу боюнча кеңири маалымат берип кошумчалады.
​Биздин лицей ар дайым сергек жашоо образын жана жаштардын аң-сезимдүү келечегин колдойт!

№16 кесиптик лицейде киберкылмыштуулуктун жана дропперликтин алдын алуу боюнча түшүндүрүү иштери жүргүзүлдү.

admin /

​№16 кесиптик лицейде жаштар арасында киберкылмыштуулуктун алдын алуу, интернеттеги коопсуздукту камсыздоо жана «дропперлик» (мыйзамсыз акча каражаттарын айлантууга катышуу) сыяктуу укук бузууларга бөгөт коюу максатында атайын жолугушуу уюштурулду.
​Иш-чаранын алкагында «Жаштык» жатаканасында жашаган окуучулар үчүн укук коргоо органдарынын өкүлдөрүнүн катышуусунда маанилүү түшүндүрүү жана алдын алуу лекциясы өткөрүлдү.
​Жолугушууга чакырылган коноктор:
​Мирланбек уулу Азизбек — Ош ШИИБдин Кылмыш иликтөө бөлүмүнүн Киберкылмыштарга каршы күрөшүү бөлүмүнүн өзгөчө маанилүү иштер боюнча улук ыкчам өкүлү, милициянын капитаны;
​Аликулов Азамат Маматмусаевич — Ош ШИИБдин Кылмыш иликтөө бөлүмүнүн Киберкылмыштарга каршы күрөшүү бөлүмүнүн ыкчам өкүлү, милициянын капитаны;
​Досмотов Бакыт Болушбаевич — Ош ШИИБдин Ак-Буура милиция бөлүмүнүн ЖПКПнын улук лейтенанты.
​Иш-чарада каралган негизги маселелер:
​Жолугушуунун жүрүшүндө адистер окуучуларга азыркы санариптик доордо кеңири жайылып жаткан интернет-шылуундуктун түрлөрү, социалдык тармактардагы коопсуздук эрежелери жана банктык карталар аркылуу жасалган кылмыштар боюнча кеңири маалымат беришти.
​Өзгөчө көңүл «дропперликке» бөлүндү. Тагыраагы, жеңил акча табуу убадаларына азгырылып, өзүнүн банктык карталарын же электрондук капчыктарын чоочун адамдарга колдонууга берүү оор кылмыш болуп саналаары жана ал үчүн кылмыш жоопкерчилиги каралганы эскертилди.
​Окуучулар өздөрүн кызыктырган суроолорго жооп алып, интернеттеги шектүү сунуштардан кантип сактануу керектиги боюнча пайдалуу кеңештерди алышты.

«Русский дом» (Ош шаарындагы Россотрудничество) жетекчилиги менен жолугушуу.

admin /

Бүгүн Ош шаарындагы №16 кесиптик лицейде 2-курстун окуучуларынын Россиянын билим берүү жана маданият борбору — «Русский домдун» жетекчилиги менен жолугушуусу болуп өттү.
«Русский домдун» жетекчиси Дмитрий Николаевич Авраам лицейдин окуучуларын жана кызматкерлерин жылуу маанайда тосуп алып, куттуктады. Ошондой эле «Литературный диктант» сынагынын жеңүүчүлөрүнө дипломдорду тапшырды.

Борбордун жетектөөчү адиси Валентина Викторовна да окуучуларды куттуктап, мындай диктанттардын маанилүүлүгү тууралуу айтып берди. Ал орус тилинин Кыргызстанда өнүгүшүнө, жаш муундардын тилге болгон кызыгуусун арттырууга жана орус тилин жаштар арасында жайылтууга багытталган иш-чаралардын маанисин белгиледи.

Жолугушуунун жүрүшүндө окуучуларга Россияга иштөө же окуу максатында баруу үчүн зарыл болгон документтер, жолугушу мүмкүн болгон кыйынчылыктар жана Россия Федерациясынын мыйзамдарын билүүнүн маанилүүлүгү тууралуу кызыктуу видеоматериалдар көрсөтүлдү. Ошондой эле Россия менен Кыргызстандын ортосундагы өз ара кызматташтык, коомдук жайларда жана транспортто өзүн туура алып жүрүү, жүрүм-турум маданиятын сактоо эрежелери жөнүндө маалымат берилди.
Жолугушуунун алкагында «Русский домдун» жетекчиси лицейге окуу китептерин жана окуучулар менен окутуучулар үчүн көркөм адабияттарды белекке тапшырды.

Мындан тышкары, коноктор лицейдин китепкана фонду менен таанышып, китепкананын башчысы Хакимова Феруза Фанилевна менен маектешишти. Алар Россияда китепкана кызматкерлери үчүн өткөрүлүүчү семинарлар жана окуу курстары тууралуу маалымат берип, Феруза Фанильевнага алардын өткөрүлүү мөөнөттөрүнө байланыштуу жаңылыктарга көз салып турууну сунушташты.
Лицейдин тарбия иштери боюнча директордун орун басары Нурайым эжеке «Русский домдун» жетекчилигине лицей менен тыгыз кызматташып, орус тили жана адабияты мугалимдерин колдоп, билим берүү тармагына салым кошуп келе жаткандары үчүн чын жүрөктөн ыраазычылык билдирди.
Жолугушууда 2-курстун окуучулары Жаныл Мырза жана Абдулло да өз ойлорун бөлүшүп, «Русский домго» болгон ыраазычылыктарын билдиришти. Алар борбордун ишмердүүлүгү менен жакшы тааныш экендиктерин, анын иш-чараларына үзгүлтүксүз катышып келишерин белгилешти. Ошондой эле экинчи жылдан бери сынактардын катышуучулары жана жеңүүчүлөрү катары сертификаттарды жана дипломдорду алып жатышканына кубанычтарын билдиришти.

Лицейдин окуу методикалык иштери боюнча директордун орун басары Нишанова Кайыргүл эжеке лицейдин администрациясынын атынан конокторго жылуу сөздөрүн айтып, ыраазычылыгын билдирди.
Жолугушуу жылуу маанайдагы чай үстүндө уланды.
Бул жолугушуу билим берүү мекемелери ортосундагы достук мамилени бекемдеп, окуучулардын билимге, тил үйрөнүүгө жана маданияттар аралык байланыштарга болгон кызыгуусун арттырган маанилүү иш-чара болду.
№16 кесиптик лицейдин жамааты «Русский домдун» жетекчилигине мазмундуу жолугушуу, көрсөткөн колдоосу жана баалуу белектери үчүн терең ыраазычылык билдирет!
Баарыбызга тынчтык, ынтымак, достук жана жакшылык каалайбыз!