Автор: admin

«Ийгиликтүү келечек билимден башталат, ал эми билим – биргелешкен аракеттен жаралат»

admin /

Ош мамлекеттик университетинин Филология жана маданияттар аралык коммуникация институтунун Филологиялык билим берүү технологиялары кафедрасы тарабынан уюштурулган «Студенттер күндөлүгү» аттуу мотивациялык-семинарга Ош шаарындагы №16 Кесиптик лицейдин студенттери активдүү катышып кайтышты.

Семинарды белгилүү акын, жазуучу, педагог, Мамлекеттик тилди өнүктүрүү боюнча атайын долбоордун башкы адиси, Ош мамлекеттик педагогикалык университетинин окутуучусу Бектурали Исамидин уулу алып барды.

Иш-чаранын жүрүшүндө Бектур мырза заманбап жашоодогу креативдүүлүктүн мааниси, ааламдашууда адамдын орду, маалымат булагы катары колдонулган телефон жана анын пайдасы менен зыяны тууралуу терең ой бөлүштү. Ошондой эле, кеп чеберчилиги, күндөлүк жазуу маданияты жана анын жашоодогу ролу жөнүндө таасирдүү баяндама жасады. Айрыкча, күндөлүк жазууда ой-тилек, максат жана жетишкендиктерди кагаз бетине түшүрүү адамга чоң мотивация бере турганын белгилеп, жеке тажрыйбасынан мисалдар менен бөлүштү.

Семинардын жүрүшүндө студенттер менен жандуу пикир алышуу болуп, катышуучулар ар түрдүү суроолорду берип, пайдалуу жоопторду алышты. Өзгөчө активдүүлүк көрсөткөн жана суроолорго туура жооп берген студенттерге белектер тапшырылып, дем берүүчү жагымдуу атмосфера түзүлдү.

Бул семинар студенттер үчүн терең таасир калтырган, мотивация жана ой жүгүртүү жөндөмдөрүн өнүктүрүүгө багытталган маанилүү иш-чара болду. Катышуучулар жаңы билимге, чыгармачылыкка жана максаттуу жашоого шыктанышып, чоң таасир менен кайтышты

Бош жумуш орундар жана кесиптер жарманкеси

admin /

2025-жылдын 29-апрелинде С. Ибраимов атындагы Ош Улуттук драма театрында бош жумуш орундар жана кесиптер жарманкеси болуп өттү.
Иш-чарага Ош шаарынын вице-мэри Салтанат Аманова, Эмгек, социалдык камсыздоо жана миграция министри Равшанбек Азатович Сабиров, JIA бизнес-ассоциациясынын өкүлдөрү, жергиликтүү ишкерлер жана жогорку окуу жайлардын студенттери катышышты.

Жарманкеде 40тан ашуун тармакта иш алып барган алдыңкы компаниялар тарабынан 2000ден ашуун бош жумуш орундары сунушталып, катышуучулар үчүн кеңири мүмкүнчүлүктөр түзүлдү.

Бул иш-чарага Ош шаарындагы №16 Кесиптик лицейдин жамааты да активдүү катышты.

Китеп күнү

admin /

23-апрель – Бүткүл дүйнөлүк китеп жана автордук укук күнүнө карата лицейде тез окуу боюнча конкурс өткөрүлдү.

Иш-чаранын негизги максаты – окуучулардын китепке болгон кызыгуусун арттыруу, окурмандык маданиятын өнүктүрүү жана тез, түшүнүктүү окуу көндүмдөрүн жакшыртуу болду. Конкурска ар тайпадан активдүү окуучулар катышып, өздөрүнүн окуу ылдамдыгы жана түшүнүү жөндөмдүүлүгү боюнча күч сынашты.

Жыйынтыгында мыкты көрсөткүчкө жетишкен жеңүүчүлөр грамота менен сыйланышты. Бул иш-чара лицейдин маданий-агартуучулук ишмердүүлүгүндө маанилүү орунду ээлеп, окуучулар арасында китеп окууга болгон кызыгууну дагы бир жолу күчөттү.

Ачык эшик күнү

admin /

2025-жылдын 25-апрель күнү Ош шаарындагы №16 Кесиптик лицейде «Ачык эшик» күнү өткөрүлүп, көптөгөн кызыктуу жана маанилүү иш-чаралар уюштурулду. Кесиптик лицейге мектептен келген конокторду лицей жамааты шаӊдуу музыка жана жылуу маанай менен көӊүлдүү тосуп алышты. Бул иш-чаранын негизги максаты — лицейдин ишмердүүлүгүн жана окутулуп жаткан кесиптер,  материалдык-техникалык базасы менен кеңири тааныштыруу.

Ачык эшиктер күнү боюнча лицей окуучулары өз колдору менен жасаган кол өнөрчүлүк иштерин көрсөтүштү. Коноктор аларды кызыгуусу менен карап, баалашты. Жарманкеде жасалган буюмдар жана чыгармачыл иштер, келечектеги адистердин эмгегинин жыйынтыгы болуп, мектеп окуучуларынын шыктарын ачууга жакшы мүмкүнчүлүк түздү.

Мектеп окуучулары жана окуучулар менен кошо келген мугалимдер жана ата-энелер кызыккан суроолоруна жооп алуу үчүн экскурсияга катышып, лицейдин кеңири жана заманбап шарттары менен таанышты. Лицейдин материалдык базасы, жабдыктары жана жаңы окуу куралдары алардын көптөгөн суроолорун жоопко алып, жалпы билим берүү процесси жөнүндө түшүнүктөрүн кеңейтти.

Иш-чаранын аягында кесиптик лицейдин жетекчилери жана мугалимдери мектеп бүтүрүүчүлөрүнө өз насааттарын айтып, аларды келечектеги ийгиликтерине шыктандырып, жакшы тилектерди арнады. Бул ачык эшик күнү, чындыгында, мектеп жана лицей ортосундагы байланышты чыңдап, окуучуларды келечектеги кесиптик тандоолоруна түрткү болду.

Мектептен келген мугалимдерге, окуучуларга жана баласынын келечегине кызыккан ата-энелерге ыраазычылык билдиребиз. Бул иш-чара мектеп жаштары үчүн кызыктуу жана пайдалуу болду, ошондой эле лицейдин эмгекке жана билимге болгон мамилесин көрсөттү.

DARYA SCAFFOLD – өтмө компетенциялар

admin /

SCAFFOLD Мониторинг: Сабактардын эффективдүүлүгүнө баа берүү

2025-жылдын 17-апрелинде Ош шаарындагы №16 Кесиптик лицейинде SCAFFOLD карталар топтому боюнча жүргүзүлүп жаткан иш-аракеттердин жүрүшүнө жана сабактардын эффективдүүлүгүнө мониторинг жүргүзүү максатында Республикалык илимий-методикалык борбордун директору А.Д. Карабаев жана бөлүм башчысы А.Т. Дондошов окуу жайга келишти.

Алар жеринен өндүрүштүк жана теориялык сабактарга катышып, жүргүзүлүп жаткан иштерге күбө болушуп, өздөрүнүн оң баасын жана сунуш-пикирлерин билдиришти.

Мониторингдин жыйынтыгында, аткарылган иштер жана жөнөтүлгөн отчеттун негизинде Жылчыева Гулиза Каныбековнага жогорку даражадагы жетишкендиги үчүн значок жана эл аралык тренер наамы ыйгарылды.

«Ийгилик артынан ийгилик»

admin /
№16 Кесиптик лицейдин билим берүүдөгү биримдиги: Ош МУнун конференциясындагы жыйынтыктар.

Ош мамлекеттик университетинин Филология жана маданият аралык коммуникация институтунун Филологиялык билим берүү технологиялары кафедрасы тарабынан уюштурулган “Кыргыз тили жана адабиятын окутууда актуалдуу маселелер” аттуу эл аралык илимий-педагогикалык конференцияга №16 Кесиптик лицейдин директору Абжалиева Нематхон Токобековна жана кыргыз тили жана адабияты мугалими Байтикова Нурайым Батырбековна чакырылып, активдүү катышып келишти. Иш-чарага жогорку окуу жайлардын, орто кесиптик билим берүү уюмдарынын, мектептердин жана №16 Кесиптик лицейинин жетекчилери менен мугалимдери катышты. Конференция жогорку деңгээлде өтүп, учурдагы билим берүү багытындагы актуалдуу маселелер, сунуштар жана ойлор талкууланды. Конференция алкагында жети секция иш алып барып, алардын ар биринде өзүнчө темалар каралды. Айрыкча, кыргыз тили жана адабиятын окутуу, жаңы технологияларды колдонуу жана заманбап окутуу ыкмаларын киргизүү боюнча баяндамаларга өзгөчө көңүл бурулду. Бул иш-чарага 150дөн ашык кесиптештер катышып, өз ара тажрыйба алмашуу, пикир бөлүшүү жана жаңы идеяларды талкуулоо мүмкүнчүлүгүнө ээ болушту. №16 Кесиптик лицейдин директору Абжалиева Нематхон Токобековна лицейдин өнүгүүсү үчүн көптөгөн окуу жайлар жана мекемелер менен кызматташтык келишимдерин түзүп, активдүү иш алып барууда. Конференциянын жыйынтыгында Ош мамлекеттик университетинин Филология жана маданият аралык коммуникация институтунун Филологиялык билим берүү технологиялары кафедрасы менен №16 Кесиптик лицейдин ортосунда расмий кызматташтык келишими түзүлдү. Жыйынтыктоочу бөлүгүндө уюштуруучулар катышуучуларды келечекте да ынтымакта, максаттуу иштерди улантууга чакырышып, ыраазычылык каттары жана сертификаттар менен сыйлашты.

WorldSkills Кыргызстан – Республикалык чемпионат

admin /

2025-жылдын 14–17-апрель күндөрү Бишкек шаарында өткөн “MasterSkills Кыргызстан – Республикалык жумушчу кесиптер чемпионатында” «Технология мода» компетенциясы боюнча Ош шаарындагы №16 Кесиптик лицейдин өндүрүштүк окутуунун устаты Раимберди кызы Перизат I-орунду багынтты.

Мындан сырткары, аталган чемпионаттын алкагында “WorldSkills Kyrgyzstan” жумушчу кесиптер сынагында 31-ШВ-2023 тайпасынын окуучусу Токонова Самара Арстаналиевна жогорку деңгээлдеги кесиптик көндүмдөрүн көрсөтүп,  Сертификат менен сыйланды.

Кыргыз Республикасынын Өкмөтүнүн 2021-жылдын 4-майындагы №200 токтому менен бекитилген 2021–2040-жылдары Кыргыз Республикасында билим берүүнү өнүктүрүү программасынын негизинде, Билим берүү жана илим министрлиги 2025-жылга карата иш-аракеттер планынын алкагында, ошондой эле “Алтын казык” билим берүү системасын трансформациялоо программасын ишке ашыруу максатында, “Worldskills Kyrgyzstan” жумушчу кесиптер боюнча экинчи чемпионаты уюштурулду. Бул иш-чара жаштар арасында кесиптерди жайылтуу жана жумушчу кадрларды даярдоонун сапатын жогорулатууга багытталган

Жашоо көндүмдөрү жана ишке орношуу

admin /

2025-жылдын 8-апрелинен 11-апрелине чейин Ысык-Көл облусунун Чолпон-Ата шаарында болуп өткөн Афлатун программасынын «VIBEs» долбоорунун «Жашоо көндүмдөрү жана ишке орношуу» тренингинин жыйынтыгы чыгарууга долбоордун менеджери А.Муратов, долбоордун башкы адиси Р.Исмаилова, Билим берүү жана илим министирлигинин башкы адиси Г.Дж.Абдылдаева, Республикалык илимий-методикалык борбордун директорунун орун басары Н.А.Саттарова жана А.К.Курманалиевна катышып, «Жашоо көндүмдөрү жана ишке орношуу» курсунун мониторинги жүргүзүлүп, анын негизинде мыкты жыйынтык көрсөткөн №16 Кесиптик лицейдин улук устаты Нишанова Кайыргул Алишеровнага окуу жайда көндүмдөрдү жайылтууга жана өнүктүрүүгө кошкон салымы үчүн  баалуу белектер менен сыйланды.

Дүйнөлүк мектептик олимпиада

admin /

Ош шаарындагы №16 Кесиптик лицейинин окуучулары Улуу Ата Мекендик согуштагы Жеңиштин мааракесине арналган Дүйнөлүк мектептик олимпиаданын биринчи этабына катышып, сертификаттарга ээ болушту.

Бул олимпиада үч этаптан турат жана онлайн форматта өткөрүлөт. Дүйнөлүк мектептик олимпиаданын финалисти болуу үчүн катышуучулар бардык үч турдан ийгиликтүү өтүшү керек.

Окуучуларыбызга албан ийгиликтерди каалайбыз! Ар бир кадамыңар жеңишке жетелеп, билим сапарыңар дагы да улансын!

Жеңиштериң улана берсин!

admin /

Ош шаардык дене тарбия жана спорт комитети тарабынан өткөрүлгөн Кыз-келиндер күрөшү боюнча чемпионатта  кыздар арасында 1-орунду ээлеген №16 Кесиптик лицейинин 47-ШВ-2023 тайпасынын окуучусу Ташбаева Феруза спорттун «күрөш» түрүндө ийгилик жаратты. Ийгиликтериң мындан ары да уланып, Кыргызстандын желегин желбиреткен кыздардын атын толуктап жүрө бер!